Read more

Nairobi(Allcayn: Sida lagu sheegay war murtiyeed ay soo saartay Dowladda Kenya ayaa waxaa lagu sheegay inay ka war heshay xogo la xidhiidha in dagaalyahano ka yimid wadamada Caalamka ay ku qul qulayaan Soomaaliya, si ay uga bar bar dagaalamaan Kooxaha Islaamiyiinta ee ka wada geyiga Soomaaliya Dagaalada aan kala joogsiga lahayn.

Wararka ayaa waxay intaasi ku darayaan in Wasiirka Arrimaha Dibada Kenya Moses Wetangula uu sheegay isaga oo ku sugan magaalada Nairobi xilli uu wareysi siinayay wakaalada wararka ee AP in dagaalyahano ka socda dalalka Ciraaq, Pakistaan, Afganistaan iyo dalal ka tirsan Afrika ay ku qul quleen Soomaaliya si ay uga barbar dagaalamaan xoogaga Islaamiyiinta.

Dhina kale mar wax laga  weydiiyay hadii uu hayo tirada dagaalyahanadaas ayuu sheegay in tiro go'an aanu heyn, hase ahaatee walaaca ugu weyn ayuu sheegay inay tahay in falal argagixiso ka geystaan dalalka Gobolka iyo caalamka intiisa kaleba.

Wasiirka ayaa waxuu sidoo kale sheegay in qalalaasaha iyo sharci la'aanta ka jirta Soomaaliya ay fududeysay in dagaalyahano ka yimid dalal fog ay galaan Soomaaliya, kuwaasoo uu cadeeyay inay xiriir dhow la leeyihiin Al-Qaacida oo ay cadaawad weyni ka dhaxayso dalalka Reer Galbeedka.

Isaga oo hadalkiisii siiwatana waxuu yidhi "Soomaaliya waxay hoy argagixiso u tahay Al-Qaacida, dagaalyahanada ajaaniibta waxay garab siinayaan Kooxda mayalka adag ee Shabaab" welibana waxuu carabka kusii adkeeyey ahmiyda ay lee dahay in arintan indho fiiqan lagu eego amaba sida ay laga maarmaan u tahay xasilooni ka dhalata Soomaaliya.